我與幻想學園 - 秋

幻想學園橫跨小6到中3四年嘅歲月，係童年玩過嘅少數online game裡面，最沉迷嘅一隻。正服嘅人最認識我，應該係我用第一個名嗰陣，嗰陣小學畢業冇耐，冇大家咁有文采去起啲四字成語加標點符號嘅名，所以on9啲又簡單啲－－Jack秋。

以前最深刻嘅，無疑一定係同17T17P版主「忽略9122」一齊日夜升LV嘅日子，由最初喺互相認識嘅公會「東京事變」，到中後期一齊成立嘅「魑魅魍魎」，中間經歷咗好多野，印象中都好似嘈過幾次交。

嗰段時間每日都會上線，就算冇野做都會開黎掛機，同人傾下計吹下水，其實都幾開心。但搞笑嘅係我從來都冇同game入面認識嘅人見面，可能因為嗰陣仲細，唔係太夠膽出黎網聚，如果唔係我都真係想同「忽略9122」同埋各位game友見個面做個朋友。雖然係咁，但唔記得咗點解當初點解會識咗個姐姐，佢仲要晚晚打電話過黎同我掛機，剩係記得當時大家都喺一個叫「路一直都在」嘅公會認識。

其實有好多細節都已經唔記得，我嘗試列出一啲大家可能會有共鳴嘅人事：

1）正服最大煩膠「火炎鳥」，每日剩係喺李護(?)嗰邊洗普頻：「換寵物」

2）幻想學園嘅故事其實建構得幾好，引用咗歷史（楚漢劉邦項羽）、神話（阿努比斯、山海經）、科幻元素，遊戲體驗好豐富，令我會認真睇每個npc嘅對話

3）每個星期六嘅測驗都一定會俾「忽略9122」壟斷第一名，其他人根本唔會贏到「教授」稱號

4）除左稀有寵物之外，最多人用就係樹棠同諸懷，一個智慧最高，一個力量最高，當時寵物點數高過4.7就為之勁

5）大家無聊就會去17T17P開post傾計洗版

6）係主校之外嘅地圖掛機有機會俾人開紅殺

7）地理系最強配點一定係點3體2敏，重生之後幾乎單挑無敵

8）主校掛機一定會正對住銀行個方向，有時候大家會一齊並列咁企好似好疊馬咁

9）要令個角色閃閃發光就要令個裝備0耐久度

10）幽冥水晶同埋每個系有幾本書真係好難出

自公寓系統開放後，大家發現咗可以bug錢bug寵，破壞遊戲平衡，所以到後期就心淡冇再玩了。2013年4月8日，係遊戲迎來壽終正寑嘅日子，我最後上返一次線，竟然仲有人認得我，嗰下確實係有少少百感交集。入U之後知道隻game原來有私服，所以為咗重拾童年回憶我都down咗黎玩一陣，最後因為太少人就冇再玩落去。

最後想點名感謝下喺隻game入面曾經同我有交集而我又記得嘅人，因為你地有份帶俾我快樂：忽略9122、朱雀、愛消逝（茄）、Joanna 、我好靚仔、同埋一堆我明明記得但偏偏醒唔起你地game名嘅人。